يا فلاح الهـم خيّـم فـوق قلبـي يـا فـلاح=كيف تبغاني اسولف وانـت خابرنـي عليـل
ويش قولك في عليل ٍ في حياتـه مـا ستـراح=تنتثر دمعـة عيونـه لاظلـم الليـل الطويـل
حالته لا ما تباعد حـال ( سلطـان الربـاح )=بالخطا راحت حياتـه والخطـا مالـه مثيـل
كان ويّا صاحبـه اثنيـن فـي أرض ٍ بـراح=يطردون الصيد دايم من صبـح ليـن المقيـل
اجمعتهم صحبة الدنيـااا علـى جـد ومـزاح=ما يهابـون الليالـي والحمـول اللـي تميـل
ما قتل عامـد ولكـن ثـوّر ابليـس السـلاح=بالخطا ثار السـلاح ويـن يلقـى لـه دليـل
انعقد سجنه .. وربعـه تنتظـر فـك السـراح=والاكيد انه سجين وما رضـووا ربـع القتيـل
هل دمعـه يـوم صلّـى ركعتيـن فالصبـاح=في نهار الجمعه اللي مـن ثقيـل ٍ فـي ثقيـل
هلّل وكبّر .. ونفسـه تذكـر اللـي راح راح=كان في ربعه عزيز .. وذلّـه الوقـت الذليـل
(لا محمد لا تهانـي لا سعـود ولا صـلاح )=كلهم كانوا على بالـه وهمّـه فـي ( هديـل )
طفلة ٍ مـا كمّلـت عاميـن صايبهـا كسـاح=وانتثر دمعـه وحالـه مـن سبايبهـا نحيـل
حان تنفيذ القصاص .. وغطوا الراس بوشـاح=وجاك سيّافه يشيل السيف ابـو حـد ٍ صقيـل
ارتخى راسه .. وزاد الموقف الحامي صيـاح=بين نوح وبين دمع وبيـن صيحـات وعويـل
وارتفع صوت الحشود .. وزاده محمد وصـاح=يا يبه تكفـى دخيلـك تستمـع قـول الدخيـل
يا يبه وشلون نصبر كيـف نهجـع بارتيـاح=وانت من دنيااا عيالك ماخـذك مـر الرحيـل
يا محمد .. هاك علمي واحفظه قبـل المـراح=انتبـه لاخوانـك وبالـك عليهـم لا تعـيـل
والله الله .. فالصـلاة وفالصيـام وفالصـلاح=والله الله .. فـ( امكم ) والله لكم بعـدي كفيـل
غمّض عيونـه ونفسـه تطلـب الله السمـاح=رافـع ٍ سبابتـه .. ( مظلـوم ) والله الوكيـل
سل سيّاف الصفـا سيفـه ودقـه ثـم طـاح=راس (سلطان المراجل ) وانتثر دمـه يسيـل
غسلوه .. وكفنوه .. وفاح طيب السـدر فـاح=وبالمصادف صار قبره جنب قبر ( ابن العقيل )
يا فلاح .. الكارثه ما هي سوالـف يـا فـلاح=خلنـي ساكـت ودوّر غيـر هالقصـه بديـل

المشاركة الأصلية كتبت بواسطة الغريب والله قصيده محزنه .. وصراحه أهله ضيقوني والله يعفوا عنا وعنهم ... ولك الشكر ..

المشاركة الأصلية كتبت بواسطة متقروش :( قـد سمعتهـآ من قـبل .. وِآلله ما قـطع قلبي إلآ عيّآلـه :( وبعـدين أهـلـه دامـه يدرون إنهـم أخويا ورا ما يسآمحــون :( ثـآنـكس مهجوٍِله ع آلقصيـده لآهنتِ أم مِـزعـل ..

المشاركة الأصلية كتبت بواسطة ريم نجد والله قصيده تبكي مافيه شي يضيع عند الله لو عفو عنه كان احسن مشكووره مهجووله

المشاركة الأصلية كتبت بواسطة أمـيـر ~ الـذوق ~ والـرقه يا محمد .. هاك علمي واحفظه قبـل المـراح انتبـه لاخوانـك وبالـك عليهـم لا تعـيـل والله الله .. فالصـلاة وفالصيـام وفالصـلاح والله الله .. ف( امكم ) والله لكم بعدي كفيـل غمّض عيونـه ونفسـه تطلـب الله السمـاح رافـع ٍ سبابتـه .. ( مظلـوم ) والله الوكيـل سل سيّاف الصفـا سيفـه ودقـه ثـم طـاح راس (سلطان المراجل ) وانتثر دمـه يسيـل غسلوه .. وكفنوه .. وفاح طيب السـدر فـاح وبالمصادف صار قبره جنب قبر ( ابن العقيل ) يا فلاح .. الكارثه ما هي سوالـف يـا فـلاح خلنـي ساكـت ودوّر غيـر هالقصـه بديـل كلمات مؤثره ومـــشكوره اختي مهججوله على هالقصيده