السلام عليكم ورحمة الله وبركاته
كيف حالك اختى خبله .. يا حيا الله بنت الإمارات
أولا أعتذر على الرد المتأخر بس لما شدني العنوان ودخلت قلت ما راح أطلع إلا بعد الرد والتعليق
ثانيا أحيي فيك روح الوطنيه وهذا شي طيب إنك تحامين عن وطنك وتدافعين عنه
وكل واحد فينا ما راح يرضى إن وطنه ينهان لأي سبب ..
بس انتي لو دققتي بالكلام ولاحظتي الردود اللي اقتبستيها كانت تتكلم عن البرنامج نفسه
بغض النظر هل البرنامج يحمل اسم الإمارات أو غيرها ..
ومن ناحية الإعتراض أنا أشوف من حقهم يعترضون لأسباب عديده :
أولا // ناصر الفراعنه شاعر كبير والكل يشهد له من قبل شاعر المليون
ثانيا // أثناء مشاركته بمرحلة الـ 48 هو الوحيد اللي أخذ الدرجه الكامله ..
ثالثا // أثناء مشاركته بمرحلة الـ 24 كانت النتائج تحسم عن طريق التصويت لكل ست شعراء في كل حلقه
وناصر أخذ اعلى نسبة تصويت وانتقل إلى المرحله النهائيه
رابعا // بالمرحله النهائيه ( الحلقه الأخيره ) كان للجنة التحكيم 50% وللجمهور 50%
واللجنه ما قصرت اعطته 46 من خمسين وكانت درجة ناصر اعلى درجه من بين الشعراء الخمسه
لكن لما عرضوا تصويت الجمهور كانت درجة ناصر 48 درجه وكانت درجته أقل درجه من بين الشعراء
فإيش اللي تتوقعينه من ردة فعل جمهور ناصر على هالشيء ؟
اللجنه عطته 46 وبعد تصويت الجمهور أخذ 48 معقوله ما جا ناصر إلا صوتين << قيسيها بالعقل
وهذا أكبر دليل على التلاعب بنتيجة التصويت
والكل منصدم بالنتيجه بصراحه خصوصا إن جمهور ناصر ما هو بسيط سواء من السعوديه أو خارج السعوديه
حتى اخواننا في مصر ما قصروا بالتصويت له في المراحل السابقه برضو اهل الخليج
وصراحه شي ما يدخل العقل والنتيجه ملعوب فيها والله اعلم وما يندرى من اللي وراه
على الأقل ياخذ المركز الثاني أو الثالث
مو ما عنده الا صوتين ويطلع هو اقل نسبة تصويت
وأكبر دليل إن التصويت ملعوب فيه كلام الدكتور غسان في حلقة تكريم الشعراء الثلاثاء اللي فات
لما قال إن اللجنه أعطت كل شاعر حقه من الدرجات بكل مصداقيه وإذا كان فيه اي اعتراض فليبحث الشاعر عن الخلل الحاصل له في النتيجه
المفهوم من كلام الدكتور إن الخلل في التصويت مو في درجاتهم اللي اعطوها للشعراء
اللي أبي أوضحه لك عزيزتي إن عبارات الأعضاء اللي تنم عن الغضب مثل ما قلتي
ما شفت فيها إهانه لأهل الإمارات كثر ما هي تعبر عن إعتراضهم على البرنامج أو بالأصح سياسة البرنامج والنتيجه الغير متوقعه
وأهل الإمارات على العين والراس وما لهم منا الا الحشيمه والكرامه
وبالنسبه للمباراة اسمحي لي اقول لك إن شاعر المليون شي والمباراة شي ثاني
وما فيه اي مجال مقارنه بين الاثنين
وبالأخير البيرق صار من نصيب خليل الشبرمي ويستاهله ..وهذا نصيبه
وأكبر بيرق لناصر الفراعنه محبة جمهوره له بدليل استقبالهم الفظيع له بالمطار
ووصول عدد المستقبلين له أكثر من 10000 شخص ..
وهذا الحدث لوحده يثلج الصدر ..
وبرنامج شاعر المليون بالنسبه لي برنامج أكثر من رائع ومن أنجح البرامج الشعريه
وانا عن نفسي استفدت منه بشكل ما تتصورينه وهذي كلمة حق اقولها
بغض النظر عن سياسة البرنامج أو تقييمهم للشعراء سواء لجنه أو جمهور
أتمنى اختي خبله إنك ما تتحسسين من الموضوع لأنه زي ما قلت لك ما يمس اهل الامارات بقدر ما هو اعتراض على النتيجه
وهذا من وجهة نظري واتمنى انك تتقبلينها ..
والسلام عليكم ورحمة الله وبركاته ..