مرحباً وأهلاً بمن جاء إلينا العز تجلى والنور هل علينا
مرحباً بك بين زهور الإبداع ورحيق الأخوة وشهد المحبة
إنتثرت الورود وتفتحت الأزهار لهذا القدوم المميز
الذي جعل المنتدى يشع نوراً وفاحة رائحة عطرك
أتمنى لك اجابات هادفة و نافعة
أهلا فيك اخوي صادق .. وأشكرك على هذا الترحيب الساخن ..
والمنتدى منور بوجودك ..
وازدادت صفحتى نورا وتميزا بوجودك فيها ..
بسم الله ...إليكي اختي الكريمة خجل ...أسئلتي الساخنة .....!!
والله من شفتها 30 سؤال وانا داريه انها ساخنه ..
وان شاء الله تلقى اجوبه ساخنه ..
1 - هواياتك ؟؟
الانترنت ,, كتابة الشعر والخواطر .. السباحه .. الرسم والفن التشكيلي
2 - أكثر شي عاجبك في المنتدى أكثر شي مضايقك فيه؟
أكثر شي عاجبني بالمنتدى .. أعضاؤه من مهجولين ومهجولات ..
عسل وربي .. ذوق .. احترام ..
وأكثر شي يضايقني فيه .. لما ما يتفاعلون مع الموضوع ..
ومايعطونه حقه من الردود
3 - شنوالشي اللي سويته وندمت عليه في حياتك ؟
ما أتذكر انو فيه شي سويته وبعدين ندمت عليه ..
4 - -قرأت مرة: من السهل التضحية من أجل صديق ... لكن من الصعب ايجاد صديق يستحق التضحية ....
-هل وجدت هذا الصديق ؟! وهل أنت مستعد للتضحية ؟!
صراحة . . انا كنت متوهمه اني وجدت هذا الصديق .. لكن للأسف ماصارت صديقه بمعنى كلمة صديقه ..
وبالنسبه للتضحيه .. مستعده أضحي بس لما تكون فعلاً تستاهل التضحيه ..
5 - هل تتمني شي من زمن بعيد ان يصير ولحد الان ما صار ؟
صراحة .. من زمان وانا اتمنى اني اسافر برى المملكه .. والى الآن ماحصل ..
بس أبشرك انو بيصير في القريب العاجل ..
(( كثر الدق يفك اللحام ))
6- لو عطيتك باقه ورود ملونه لمن تهدي هذي الورود .:
الورده البيضاء :: للي في بالي
الورده الحمراء :: برضوه للي في بالي
الورده الصفراء :: ايضا للي في بالي
7 - في يوم كنتي معزومه عند حرم الوزير وجاتس بنت الوزير حبت تتميلح وصبت ليتس كوب شاي بس بدال ماتحط ليتس سكر حطت ملح .. وش يكون موقفتس ؟؟؟
أكيد ماراح أشربها .. وبإختصار راح اقول ..
الدكتور مانعني اشرب شاي ... خخخخخخخخخخخخ
8 - وش تفضل البنت بفارس احلامها من وجهة نظرتس .. ان يكون حلو وناعم ويحط مكياج ويلبس حرير .. ولا يكون خبل ومطفوق وملحوس عقله .. ولا يكون شين وقوي وخفيف دم بس راعي تتن ؟؟؟
وش ذاللي انت مجمعهم لي .. عوير وزوير والمنكسر واللي مافيه خير ..
ياشيخ لو ماباقي بهالدنيا الا هالجحلط .. والله ما اتزوج ..
والله ما اردى من هذا الا هذا ..
والله يخلف على اي وحده تفكر تتزوج أي احد من هالاصناف ..
9 - مارأيك في نتف الحواجب ؟
رأيي رأي أي وحده حطت في بالها حديث الرسول اللهم صلي وسلم عليه لما قال : (( لعن الله النامصه والمتنمصه ))
أغضب ربي وأصير ملعونه عشان ايش ..
وعلى فكره مو على انها تغضب ربي وبس .. برضوه فيه مضار على الصحه ..
بحيث انو مع نتف كل شعره من شعر الحاجب .. تموت خليه من خلايا الدماغ ..
10 - ماذا تقولين في شخص يتهمك بالخيانه وانتي مظلومه
الكلمه هذي وقعها كبير على متلقيها إذا كان فعلا خاين ..
فكيف وقعها عليه اذا كان مظلوم ..
ما اقول الا الله يسامحه .. وهو الخسران طبعاً ..
وانا لا خسرته ما اخسر الجنه .. .. واحد بداله يجي عشرين ياعمي ..
11 - ماهو القلم المثالي بنظرك في منتديات المهجولون العرب...؟
صراحة كثير اللي أقلامهم مثاليه بالمنتدى ..
وأخاف احددهم وأجحف بحق أعضاء آخرين .. فاعذرني على عدم التحديد ..
والحقيقه أن أغلب الأقلام في المنتدى مثاليه ومبدعه ورائعه ..
12 - شنــو اســوأ يــــوم مــر فى حيـاة خجل ( بعـيد الشـر عنـك ) ؟؟
أسوأ يوم مر علي .. اليوم اللي دخل فيه ابوي للمستشفى عشان يسوي عملية إنسداد شرايين .. وأنا ما اقصد القسطره .. لا عملية ( قلب مفتوح )
خصوصا إن نسبة نجاح العمليه مو مضمونه ..
13 - شنو احلـــــــــى يوم مــر بحيـــاة خجل
احلى يوم لما طلع ابوي من المستشفى ورجع ينور بيتنا من جديد ..
14 - شنــو افضــــــل بيــــت شعـــــــــر قــرأتيــه
أبكيتني وأنا أحسبك تكره بكاي .. .. أثرك تلذذ بدموعي وأنا ابكي ..
15 - من الذي ترتاحين من كتاباته في المنتدى
صراحه .. جميع الاعضاء استمتع بقراءة مواضيعهم وارتاح لها ..
16 - ما هو هدفكي في الحياة
رضا الله أولا .. ثم رضا الوالدين ثانيا ..
ثم إكمال تعليمي .. والحمد لله هانت ما بقى الا الاختبارات واتخرج ..
17 - ما هو القسم الاكثر حيويه في رائيك في المنتدى
صراحة أغلب الاقسام نشيطه وذات حيويه ..
وأكثر شي قسم الحوار .. لأنه تتسنى فيه المناقشه وابدآء الآراء .. وطرح وجهات النظر ..
18 - ماهي أحب الصفات فيك وتودي أن لا تستغني عنها ،
وما هي الصفة التي فيكِ وتتمنين أن تلغيها ؟؟؟
صراحة .. أنا ولله الحمد متسامحه وأتغاضى .. واتمنى اني ابقى على كذا علطول ..
وبالنسبه للصفه اللي ابي ألغيها .. الحساسيه الزايده ..
19 - يقولون ... طيبة القلب في هالزمن ماتنفع << مادري شرايك بهالعبارة
والله الطيبه أشوفها اهم شي لازم يتحلى به الانسان ..
والمفروض من الواحد عشان مايفقد هالخصله الحلوه فيه .. وفي هالزمن بالذات .. لازم يعرف كيف يتعامل مع الاشخاص اللي امامه ..
مو يخليهم يضحكون عليه ويستغلونه بعدين يجي يدربي راسه ويقول الطيبه ماتنفع هالايام ..
20 - اي أنواع الكتب تحب قراءتها ؟ وماهو الوقت المفضل لديك للقراءه ؟
دواوين الشعر .. والمجلات المعنيه بنشر القصائد .. واحب اقرا الخواطر
وكتب القصص بانواعها .. الدينيه والخياليه والفكاهيه .. وغيرها ..
وأفضل وقت عندي .. ( بالليـــــل ) لما يهدى الجو .. وأكون خلصت أشغالي ..
21 - ماهي كلمتك للشباب المتهورين الذين يسيرون في الشوارع بسرعه جنونيه
أقول لهم .. تراكم رايحين للموت برجليكم ..
(( لا تسرع ,, فالموت أسرع ))
وتمهل .. واذكر دموع المحبين ..
يعني وش بتستفيد لو صار لك شي لا قدر الله .. وفقدت الذاكره .. ولا فقدت عضو من اعضاءك ولا انشليت ولا انكسرت رقبتك ..
بعد زين اذا صار كذا وما توفيت ورحت في خبر كان ...
22 - في اعتقادك ماهي الصفات التي تجعل من الشخص محبوبا من الجميع ؟
الاحترام والطيبه والابتسامه والكلمه الطيبه والتعامل بما يرضي الله
23 - وشو شعورك لو نزلتي موضوع ومحد رد عليه ؟
آآآآآآآه يا هالشعور .. أنواع الاحباط والتحطيم ..
اتذكر اني طرحت هالموضوع بقسم الحوار والمناقشه ..
لمعرفة المزيد .. الرجاء التوجه لقسم الحوار والمناقشه ..
24 - يوم في اسبوع مااتحبينه؟؟
يوم السبت عشانه اول يوم هو اثقل يوم ..
25 - شنو اكثر شي اتحبينه في المنتدى ؟؟
صراحة كل شي في منتدى المهجولون احبه .. الاقسام .. والمواضيع .. والاعضاء ..
26 - ,, ماذا يعني لك نثر حروف الخاطرة
يعني لي اشياء كثيره .. فهو إبداع حسي تترجم فيها الأحاسيس العذبه ..
حروف لها في النفس تأثير .. وفي العقل تعبير ..
تقرأ لها فتشعر بمدى شفافيتها وجمالها .. تتضمن النزف الرائع .. الذي أواسي به نفسي .. كما أنها تجعلني أشعر بمن حولي .. ومن خلالها أ ُشعر من حولي بي ..
27 - هل برايك الحب نعمه ام نقمه .
الحب أكبر نعمه .. إذا وجهناه الوجهه السليمه ..
إضافة الى ذلك أن من لا ينعم بهذا الاحساس .. فهو مجرد وخالي من الاحاسيس الحيه .. التي تجدد لنا الروتين .. وتجعلنا ننظر الى الحياة بشكل اجمل ..
ويكون نقمه .. إذا سار في غير مساره الصحيح ..
28 - ماهو شعورك وأنت على كرسي الاعتراف .
شعوري أكثر فرحة مما تتصور .. إذ أنه تسنى لي التعرف بشكل أكبر على اخواني واخواتي أعضاء المنتدى .. وهذي احلى فرصه جعلتني آخذ واعطي معهم ..
29 - ,,لو رجعت بك عقارب الزمن الى الوارء... هل كنت ستسلك ذات الطريق.
نعم سأسلك ذات الطريق .. مع محاولة تلافي الأخطاء التي حصلت من قبل ..
والتطوير من نفسي اكثر ..
30 - , ماذا يعني لك
الحزن .. عين تدمع وقلب يبكي
الهجر .. قمة القسوه والجفاء ..
الصبر .. قمة الثبات
الثقة .. أعلى درجات الشموخ بالنفس
السهر .. محطه يقف عندها كل محب يرسل فيها اشواقه او عتابه
الشك .. التأزم وعدم الاستقرار النفسي
الحب .. لغه عذبه .. قليل من يجيد ترجمتها
الوفاء .. عهد مقدس .. وارتباط وثيق
الخوف .. الرهبه .. والقلق .. وعدم الاستقرار ..
عزيزتي
آسف على الاطاله وان شاء الله مااكون ثقلت عليك بالاسئله
وش دعوه .. بالعكس .. استمتعت وانا اجاوب على اسئلتك ..
بس على فكره .. حطمت الرقم القياسي في الاسئله ..
والله يعينك
تقبلي اصدق تحياتي القلبيه
يخليك ربي